Kommande arrangement

Dette året markerar vårt 25. med konsertar og forestillinger, og meir enn 500 arrangement med billettsal er gjennomført. Og med arrangement for bedrifter, bryllup og feiringer av mange slag blir talet mykje meir enn dobla.

Vi håpar samvær og kortreiste lykkestunder kan gjera godt! Når mange av våre beste artistar kjem til gards, er også intensjonen vår å bidra til å gjera bygda og dalen litt meir attraktiv og levande.

Velkome til gode opplevingar i Rudilåven i 2024!

SØNDAG 28.07 - kl. 20.30

Frida Ånnevik med band

Endeleg gjenhør med Frida Ånnevik på Rudi Gard! Frida og musikarane hennar reiser i sommar rundt i Norge med både nye songar og kjente låtar i bagasjen.

I februar kom hennar sjette album, til strålande mottaking blant anmeldere og publikum. «VI» er ei viseplate, med Frida si særegne evne til å formidle tekst som lengre forteljingar, gjennom folketoner eller i pop-form.

Laurdag 03.08 - kl. 21.00

Dølarockens festkveld

Med Baksia, Arild Skar og Fem modige menn

Dølarockens festkveld er fast innslag i sommaren på Rudi Gard. Dølarock er fellesarv med fanskare frå dei yngste til dei eldste, og med eit stort felles repertoar er det ikkje langt etter allsang og glede.

Tysdag 06.08 - kl. 20.30

Torsdag 08.08 - kl. 20.30

Henrik Ibsens Samlede Verker på 78 minutter

av Knut Nærum

Den verdskjente dramatikaren Knut Nærum, som ofte blir nemnd i same åndedrag som Ibsen og Fosse, har teke på seg oppgåva med å skrive «Henrik Ibsens Samlede Verker på 78 minutter». Med brask og bram, og inspirert av alt frå actionfilmar og musikalar, til sportssendingar, politikarar og Gudbrandsdalen, leikar tre skodespelarar seg gjennom Ibsens 28 teaterstykke på litt over ein time. Velkommen til ein kveld på Rudi Gard fylt med smil og mykje latter!

Forestillinga er eit samarbeid mellom Kulturfestivalen Peer Gynt og Rudi Gard, og ein samproduksjon med Den Nationale Scene i Bergen.

FREDAG 23.08 - SØNDAG 25.08

Nygaardfestivalen 2024:

– til Sven Nyhus si ære!

Oddvar Nygaard var den fremste trekkspelaren i Gudbrandsdalen i si samtid. Oddvar inspirerte og var kjend med mange, og festivalen skal også heidre andre markante tradisjonsbærarar. Sven Nyhus var nær kjenning av Oddvar. Det var ikkje så mange som levde av tradisjonsmusikk og gammaldans i etterkrigstida, og dei to var pionerar og musikarkolleger. Årets festival minnes Sven særskilt, både gjennom ord og tonar.

ONSDAG 04.09 - kl. 20.30

TETT PÅ:

Britt Elise Skram og Kristina Farstad Bjørdal

Noko av det finaste i tradisjonsmusikken kan du oppleve denne kvelden med Britt Elise Skram på fele og Kristina Farstad Bjørdal på trekkspel. Frå Møre og Romsdal kjem dei til Rudi Gard i Gudbrandsdalen. Og du er velkomen til intimkonsert i ved peisen, slik du alltid er til konsertar og opplevingar på Rudi.

FREDAG 06.09 - kl. 19.00

Jubileumskonsert:

Fossajazz 30 år

Fossajazz – storbandet som med friskt pågangsmot har gått eigne og nye vegar i det gudbrandsdalske musikklivet jubilerer, og det lyt vi feire! Gamle og nye storheiter vil dukke opp i eit veltrimma jubileumsshow som kaster lys og ære over tre tiår med utruleg mykje fin musikk. Etter konserten er det mogleg å reservere bord for eit hyggeleg måltid.

LAURDAG 07.09 - kl. 21.00

Haustfest med STAUT

STAUT har løfta taket på Rudilåven fleire gonger før, og no er det dags på nytt. Med kjente og gode låtar, flotte tekster, glitrande spellemenn blir det alltid stemning når våre gode naboar frå Valdres kjem til gards.

Og som før: Lokale trubadurar og spellemenn med og utan trekkspel klemmer i veg ein skikkeleg husfest med musikk, liv og lyst over heile gardstunet.

Laurdag 28.09 - kl. 19.00

Gudbrandsfest:

Madam Jam & Gangar

Livesensasjonane Gangar og Madam Jam samlar heile Gudbrandsdalen til tidenes låveball og grillfest på Rudi Gard!

Folk og furore, flamingo og fest med folkrock og folkeleg jam i regi av Gudbrandsdal Musikkfest.

LAURDAG 19.10 - kl. 19.00

Nye Ringnesin 40 år

Jubileumsfeiring med konsert, dans og midnattskonsert

Nye Ringnesin – namnet er lånt frå spelemannslegenda Ola Ringneset, som levde frå 1825 til 1899. Tippoldebarnet hans, trekkspelaren Jon Egil Odnes, var med på å starta gruppa «Ringnesin», som vart til «Nye Ringnesin» i 1985. John har vore ryggrada i gruppa i alle år, og fleire har vore innom på ymse instrument. Denne kvelden delar dei scena med gjestespelemenn, barn og barnebarn.

Programleiarar er Even Luseter og Hans Solbakken, som går for lett og munter stemning saman med Håkon Sveen.

Spelemannslaga i Lom og Vågå byr på drivande dansemusikk, og parketten er klar i Rudilåven. Dansen går frå klokka 21 til 23.30, før festlyden blir invitert til jubileumspons rundt bålet og midnattskonsert med Bjørn Kåre Odde Folk Chamber. Vi lover – denne avrundinga av kvelden blir musikkmagi!

SØNDAG 20.10 - kl. 19.00

Sondre Moshagen Sekstett

Pianist Sondre Moshagen frå Vinstra studerar jazz ved konservatoriet i Trondheim. Sommaren 2024 vart Sondre plukka ut som den første nordmannen nokonsinne som deltakar på det prestisjefylte Gutenberg Jazz Collective og rykande ferskt: Sondre Moshagen Lightning Trio vart kåra til årets unge jazzmusikere 2024.

I denne sekstetten har Sondre samla nokre av favorittmusikerane sine frå den norske jazz- og improvisasjonsscena. Dei byr på musikk inspirert av møtet mellom natur og hektisk storbyliv, og blandar referansar frå 60-tals amerikansk frijazz, klassisk impresjonisme og norsk folkemusikk. I oktober spelar ensemblet sine aller første konsertar – 20. oktober blir dei å høyre på Rudi Gard!

FREDAG 15.11 - kl. 19.00

Iren Reppen med "Terje Nilsen altså"

og gode førjulssmakar frå Rudikjøkenet

Ein førjulskveld med god mat, god drikke, god musikk og nordnorsk humor. Vi duker med rakfisk, sylt, lefse og andre godsmaker i førjulstida, og alle som kjem denne kvelden får bord i Rudilåven. Matgildet tek til kl 19.00.

Når vi er mette og gode og klare blir det underhaldning. I lag med gitarist Håvar Langås Bendiksen spelar Iren Reppen ei konsertforestilling til ære for deira felles store helt: Terje Nilsen. Bodøs store sønn. Terje var den cooleste av dei coole. Fordi han levde som han gjorde, sang som han sang, skreiv tekster om kjærleikslengsel, om byen, om naturen, om øl, om forskjeller. Og ikkje minst om seg sjølv. Briljant og morosamt.

FREDAG 22.11 - kl. 19.00

LAURDAG 23.11 - kl. 19.00

Rudi Gard feirer 25 år med storvegs jubileumsforestilling

Vi feirer 25 år med konsertar og arrangement på Rudi. Med hesteskyss, bål, fakler og gode smaker på tunet. Og godstemninga fortsett innandørs, med ymse innslag på veg opp i låven. Frå scena møter du eit glitrande husorkester som er handplukka for anledningen, og dei spelar med nokre av dei aller beste folka frå ulike sjangere som har vore innom Rudi Gard desse 25 åra. Etter konserten er det ope i låvepøbben for trivleg samvær. Velkomen til storvegs jubileumsfeiring!

Aktørar blir presentert litt seinare.

Billett kr 990,- inkludert hesteskyss, opplevingar og skreddarsydde smaker av mat og drikke i tun og fjos, og storslagen jubileumsforestilling i Rudilåven

Tidlegare i 2024

SØNDAG 30.06 - kl. 20.30

Eva Weel Skram

Eva Weel Skram er aktuell med ny musikk, og til hausten kjem hennar tredje album med norske tekster. Fengande melodier med sterke tekster er eit varemerke.

Eva og hennar musikalske kumpaner blir å oppleva frå scener over heile landet i haust. Da er det storvegs at førpremiera rett og slett kjem her, på Rudi Gard i Gudbrandsdalen. Det lyt du få med deg, med ein knallgod middag før konsertstart!

TORSDAG 06.06 - kl. 20.30

«Humor & Kanari»

Show med humortrioen Kveli Rånes Bremseth

”Artighet varer lengst” og ”En god latter forlenger livet” er slåande motto for Kveli Rånes Bremseth.

I årevis har trioen vore omreisande i humor, og fleire titusen skakkflirte publikummere har opplevd KRB. Å ta pulsen på samfunnet, og gi eit pusterom i ein krevjande kvardag er litt av motivasjonen bak. Med utgangspunkt i Trøndelag spelar dei aller mest i Midt-Norge. Dette blir faktisk einaste kvelden sør for Dovre med denne forestillinga, og det er duka for ein suveren aften med reinhekla latter og glede.

LAURDAG 01.06 - kl. 21.00

Såmmårfest med Hillbabies og VON

Hillbabies og VON gjestar Rudilåven med drivande folkeleg rock’n roll denne første laurdagen i juni.

Hillbabies har som navnet seier henta inspirasjon frå orginalen i Hallingdal, og det gjer dei på ein særs overbevisande måte. VON kjem med eigne låtar, og det let som ei kule når dalens mest erfarne rockarar dreg i gang til såmmårfest!

TYSDAG 28.05 - kl. 20.30

Randi Marie med band

Randi Marie Steig er vokalist og låtskriver heimafrå, og med varm stemme fortel ho ekte og ærlege historier frå livets tallrike sider. Randi Marie er nå aktuell med singlen «Åpne ei dør», i lag med eit solid band samansett av gitarist Erik Granlien, bassist Pål Erik Jensen, trommeslager Kai Harald Skriubakken og Elisabeth Krohn Skriubakken på perkusjon. Saman byr dei på sarte ballader til fengande musikk i landskapet mellom country, pop, og rock.

Fredag 03.05 - kl. 19.00

Spira Spelmannslag og gjester

Konsert og dans

For tredje år på rad inviterer spelemannslaget Spira ved folkemusikklinja på Vinstra VGS til vårkonsert på Rudi Gard.

Også i år får Spira besøk av både senior og junior spelemannslag som spelar opp til dans etter konserten.

Ingen grunn til å sitta heime denne fredagskvelden - velkomé!

Tidlegare sommarprogram: